Assalamualaikum, pak Presiden.
Mudah-mudahan apak lai sihaik-sihaik sajo, jauah dari panek jo panyakik. Dek apak rintang karajo karajo karajo sajo, pasan ambo: ijan lupo, baso apak tetap manusia biaso, nan tanago baparinggo. Kok paneh cari kalinduangan, kok panek cari lah parantian.
Baa sakarang kini nangko, ujuik jo mukasuik surek ambo ko, iyolah taragak nak batagua sapo, kok bamuko-muko raso tak mungkin mako disiko sajo ambo jumalahkan apo sakiro-kiro nan marusuah manggamang di hati nan takilan-kilan di pangana.
Taradok badan diri ambo, iyolah tak usah apak sigi jo siasek bana. Nan ambo ko hanyolah rakyat badarai sajo nyo. Alah baurang rumah (lai manih manyalinok
) lah baranak pulo (lai manih jo comel pulo
). Sapanjang hari bagaluik jo rutinitas urang kabanyakan. Tak bedo jo apak, samo basitungkin mancarian paruik nan tak barisi, pungguang tak basaok.
) lah baranak pulo (lai manih jo comel pulo). Sapanjang hari bagaluik jo rutinitas urang kabanyakan. Tak bedo jo apak, samo basitungkin mancarian paruik nan tak barisi, pungguang tak basaok. Hanyo sajo, kalau di apak kok pancarian indak marusuah amek. Alun sakik ubek lah tibo, alun manangih lah babujuak. Sawah laweh pamatang panjang. Padi masak jaguang maupiah. Rasaki apak lipek takulai, sudah balipek ado juo nan takulai. Sabana sanang.
Kok nan diri ambo? Alun tasuo nan cando apak rasoan. Hari-hari di salo salo karajo tu mah hilia mudiak di medsos, sekadar palapehan uweh-uweh kaganti piknik bagi ambo, sabab kok bakongkow-kongkow di kafe bak cando urang atau jalan-jalan badarmawisata iyo ndak ajan ambo. Maklumlah ambo buruh biaso, gaji ketek, pambali bareh jo garam tak lo cukuik, bensin jo token tak buliah tidak, uang sikola jo balanjo anak ndak buliah manas, rumik lah ambo mampezoan gaji nan sabana ketek tu.
Nan sapantun urang paburu. Apolah buni pantunnyo:
Opak-opak sandaran badia
Panembak unggan di muaro
Nan bak parang ombak jo pasia
Antah pabilo ka larainyo.
Itulah saketek preambule tantangan diri ambo.
Kini kito aliah molah kaji, sungguah baraliah sinan juo.
Nan manjadi buah rundiangan dek ambo kini ko, iyolah satantang diri apak. Lah basuluah matoari bagalanggang mato urang banyak, apak kamanyambuang tugeh untuk periode kaduo. Baitu bunyi barito. Rancak. Elok bana. Ambo mandukuang.
Namun, antah baa kolah, agak regek hati ambo. Lai kolah katatampin bajibun masalah bangsa awak ko isuak. Jiko dicaliaknan nan tasudah, ampek tahun balakangan ko iyo sabana manyamak masalah di kapalo, narkoba marajalela, konflik antar kelompok tak kunjuang abih, penistaan agamo basilanteh angan, law enforcement nan tak fair dikeluhkan urang banyak.
Alun lai ekonomi rakyat nan tak kunjuang membaiak. Nan dibali sagalo maha, listrik naiak tiok sacah, bensin tak namuah tingga.
Pokoknyo cando dikapuang urang bagak: kamalawan raso tak mungkin, tapaso bauruik dado sajo.
Apak manyabuik: imprastruktur imprastruktur impastruktur. Seolah apak nan alah paliang
hebat
bisa mambangun jalan, bandara bendungan dll. Walaupun itu akhirnyo didebat kader Demokrat, baso apak cuma sekadar malanjuik an karajo pak SBY. Lun bara nan dari tangan apak lai. Sadangkan kepala negara nan sukses tu manuruik urang-urang di kampus, ndak sekadar mambangun jalan ukurannyo, tapi labiah komprehensif: stabilitas politik, kepastian hukum, kesejahteraan sosial jo pertumbuhan ekonomi. Kalau apak sabuik ekonomi awak baiak-baiak sajo, tanyo bana ka rakyat nan dibawah. Baitu nan ambo baco tulisan-tulisan pakar ekonomi pembangunan jo pemerhati politik dan pemerintahan.
Ambo danga-danga pulo, kapatang di berita tasabuik baso proyek strategis nan apak canangkan baru terealisasi 2 %.
Bayangkan, baru duo prosen? Samantaro hari tingga ciek. Tak mungkin katakaja.
Bahkan banyak Pemda nan defisit anggaran bagai. (ambo acok menulih berita soal iko).
Sakatek nan ambo sayangkan, kapatang honorer K2 baunjuak rasa mangadu ka apak, tapi apak ndak ado? Kama apak? Malam2 apak blusukan kapasa di Bogor, samantaro pendemo bamalam manunggu apak.
Kini baitulah nan karancak. Bak bunyi pantun: Pado den baladang ka Singgalang, elok dan pai ka Tandikek, di sinan batanam lado. Jiko dirantang namuah panjang, elok digumpa nak nyo singkek, ambiak sakadar kapaguno.
Sakitu sajo dari ambo nyoh, mudah-mudahan lai tamakan dek apak, bisa dipaelok an nagari awak ko.
O iyo, titip pasan ciek. Kalau bisa apak buek an lah inpres pelarangan mamakai seragam mirip militer. Karano dek kami nan rakyat ndak basikola ko agak susah mambedoan maa nan TNI ma nan Banser. Urang sipil pakai baju tantara kadang gayanyo ateh pulo dari tantara asli, songoang pulo, mano ado tentara mambaka bendera batulisan "asyahaduallah ilaha ilallah, waasyhaduanamuhammadarasulullah". Tentara gilo tu mungkin.
Alah yo Pak. Sampai tak sampai pasan ambo ko, nan jaleh uweh-uweh ambo lah lapeh. Kok ado silap jo gawa usah dibaok ka hati pulo. Rila jo maaf sajo pamanuahannyo...
Wassalam...
Lapau Mak Sutan
31 bulan Sapuluah Tahun Kini.
